Monday, September 22, 2008

ياريتنى كنت بنوتة


آه وفيها ايه لما اقول ياريتنى كنت بنت .. مش عيب ولاحرام .. اه بحقد عليهم .. عارف ليه ..؟

فـى المواصلات تلاقى الدنيا زحمة والناس فوق بعضيها تيجى بنت تقف تلاقيها واقفة براحتها او تلاقى شاب لطيف خلاها تقعد مكانه وتستريح من الوقفة والزحمة .. ولو حد عاكسها او كلمها مسافة بس ما تقوله احترم نفسك تلاقى الناس كلها نازلة ضرب فيه كأنه حمار فى مطلع زى مابيقولوه.


فــى العربية لو بنت سايقة تلاقيها ماشية براحتها وبالراحة وممكن تقف تعدل الميك اب او ترد على الموبايل او متاخدش مخالفة الحزام من غير ماتلاقى واحد ماشى وراك شتمك او بهدلك او نزل ضربك .. ولاقدر الله حصل حادثة تلاقى الناس واقفة ساكتة لاماسكين فى خناق البنت وبيكلموها عشان تهدي ومتخضش ، او العربية تتعطل بيها فى نص الشارع تلاقى مليون واحد ظهر عشان يزقها على جنب او يصلحها على سبيل الشهامة.


فــى آى مكان بيخافوا على احساس البنت ومش بيحبوا يزعقولها او يكلموها بعنف عشان ما تنهرش وتفتح فى العياط وبيكلموها بكل هدوء وأدب ولباقة.


فــى الدراسة تلاقى البنت ملتزمة ومتفوقة ومذاكرة وشطورة غير الولاد تلاقيهم مقضينها تزويغ ويجيوا ايام الامتحانات يقعدوا يعيطوا ويتحايلوا على البنات عشان يديوهم الحاجات المهمة وتلاقى البنت جابت تقدير والواد يادوب طالع بمادتين.


فـــى الجيش لاتعليق طبعا للولاد على البهدلة والوقت اللى بيضيع اما البنات بياخدوا الشهادة وهما بالهم مرتاح من غير يفكروا فى الجيش او شغل او شقة يجبوها.


فى اى علاقة البنت تقدر تبدأها وتنهيها فى اى وقت هى عاوزاه او حسب مزاجها وتتحكم فى العلاقة بمزاجها.


فــــى الجواز لو جواز الصالونات السخيف تلاقى البنت قاعدة فى بيتها معززة مكرمة والعرسان بيجو لحد عندها البيت وتختار اللى هى عاوزه وتقول شروطها بكل بساطة والعريس هو وحظه.


بـــرضه فـى الجواز تلاقى الولد شغال اربعين شغلانة وطالع عينه عشان يجهز الشقة والعفش وفى نفس الوقت خايف يقصر مع خطيبته ولا مراته عشان مشاعرها ويحاول يرضيها بالهدايا والعزومات والخروجات.


فـــى اى خروجة البنت تبقى معزومة من الولد وتقعد ملكة متحطش ايديها فى جيبها حتى لو كيس مناديل والولد عمال يدفع ويعزم ويدفع ويعزم عشان رضاها.


فـــى الشارع لو البنت ماشية مع خطيبها او جوزها او صاحبها يادوب بس تتعاكس او حد يبصلها تلاقى واحد اطحن واضرب عشانها وهى واقفة بتتفرج وممكن تشاركه بدمعتين او تقوله كفاية ضرب كده.


فى اى كمين او نقطة تفتيش يفتشوا الرجالة ويبهدلوهم ويجوا عند البنت ولاحتى يقولها بطاقة حتى.


فى المترو ليهم عربيات مخصوصة واللى يركب فيها غلط من الرجالة يدفع غرامة وهما يركبوا فى اى عربية ومحدش يقدر يقولهم حاجة.


فــى اى مناسبة تلاقى هدايا جاية للبنت من كل ناحية او من كل حتة من غير ماتتكلم او تطلب بس .


فــى البيت محدش يقدر يقولها انزلى دورى على شغل او شوفيلك حاجة اعمليها غير الولد اللى ابوه ميبقاش طايقه اول ما يشوفه فى البيت.


فــى البيت برضه البنت لما تخرج ممكن تتصل باخوها او باباها عشان يوصلها او يجى ياخدها اما الولد فيولع بجاز تصرف وتعالى لوحدك يامنيل.


بعد الجواز .. الست تبقى مديرة البيت والراجل عبارة عن الممول ومالهوش دعوة باى حاجة وهى صاحبة الكلمة الاولى والاخيرة والراجل عليه السمع والطاعة.


اى مشكلة تحصل بعد الجواز تلاقى اهل البنت جايين يشوفوا ازاى جوزها يزعلها ومليون واحد جاى عاوز يولع فى جوزها.


حتى لو انفصلوا عن بعض تلاقى العريس متبهدل مابين نفقة ومؤخر والكلام ده والبنت قاعدة فى بيتها وحقها بيوصل لحد عندها من غير ما تتكلم بس.

عشان كده واكتر الولد بيحقد على البنت ... بس حقد ليس اكثر عشان محدش يفهمنى غلط.. حقد وبس.

أمضاء واحد مش انا اكيد :D

5 comments:

~ Heba ~ said...

الله بجد

اخيرا بقى فيه حد بينصف البنات

بدل ماكل شوية نقرا بوستات ومواضيع تحرق الدم عن قد اية البنت وجودها في الحياة زي عدمه وانها مصدر النكد والكلام السخيف دة

بفرح والله لما الاقي حد بينصفنا وبيتكلم عننا بموضوعية حتى لو على سبيل التهريج

شكرا ليك :)

dr.lecter said...

اقسم بالله من اسبوعين كنت باقول الكلام ده لواحد صحبي ياريتنا كنا بنات ماتيجي يالاا نقلبههههههههه

dr.lecter said...

اقسم بالله من اسبوعين كنت باقول الكلام ده لواحد صحبي ياريتنا كنا بنات ماتيجي يالاا نقلبههههههههه

Anonymous said...

انتم فاكرين ان البنات هما اللي واخدين حقهم :)


لا والله :)


البنت بتتعب نفسيا كتير أكتر من الولد

نفسكم تبقوا بنات

هتبقوا حاجة هشة من أقل حاجة تتكسر


كل حد يبقى زي ما هو بجد أحسن :D

shabfa2re said...

لسه فيكى رجالة يا مصر
beeeeep beeeeeeeep
happy eiiiiiiiiiid