Wednesday, April 30, 2008

ده العيب فـى الضى

لـو مقدرتش تضحك ... متدمعش ولاتبكيش
وان مافضلش معاك غير قلبك اوعى تخاف مش حتموت ... حتعيش

ســـكون

الكلام ده تخاريف قعدت اخرفها انا وعم محمود بتاع نصبة الشاى اللى قدام وزارة الاعلام
كنت قاعد معاه وانا جاى من الساقية
وقولت اقعد معاه شوية
لاقيت ع الكورنيش راجل عجوز بنصبة شاى قاعد ع الناحية التانية من وزارة الاعلام
شكله طيب اوى
قعدت وسلمت وطلبت الشاى
وقعدت ارغى معاه
لاقيته اندمج معايا
دخلنا فى موضوعنا واتكلمنا ع الصحاب
قالى بحكمة اللى سنين بهدلته
الصحوبية زى كوب الحليب الابيض ، لو وقعت فيه حاجة توظة وتلوثه
ومتخليش طعمه زى الاول
مهما نضفت وعملت فيه
الصحوبية هى الحاجة الوحيدة اللى بتختارها وانت عاوزها ومحتاجها اكتر من اى شىء
اخواتك وعائلتك يبقوا مفروضين عليك
مراتك تبقى متجوزها عشان تكمل نص دينك
اما صاحبك هو اللى بتختاره وتنقيه
قولته بس انا لما اختار مش بعرف
ويطلع اللى بختاره مش بيطقنى
قالى كده انت صح
قولته ياحاج انا ساعات كتيرة ببقى مرتاح لما بكون من غير صحاب
قالى فى يوم حتحاج واحد يقعد معاك بجد عشان هو بيحبك مش مجرد قاعد والسلام
قولته بس اللى اعرفه ان صحابى كلهم عارفنى كده
على سبيل او واحد والسلام قاعد معاهم
يخرج يتنيل
وينفضلوه فى اى وقت هما مخنوقين منى
قالى يبقى انت فيك حاجة مش مخيلة ليك صاحب
قولته انا بتعامل معاهم بصراحة
بس بلاقى العكس منهم
قالى دور جواك حتعرف مين تختاره وتعامله ازاى
خلانى افكر
اقول طب انا ماليش صحاب
وفي ناس كتيرة تعرفنى
طب لو انا عاوز ابقى صاحبهم
ياترى ايه ممكن يتغير فيا।؟؟؟

Tuesday, April 29, 2008

النهادرة الساعة عشرة ونص

النهاردة معادى معاكى .. ناس كتيرة قالتى انك مجنون وناس قالتى انى موهوم
بس النهاردة مش بيهمنى اى كلام من دول
لان معادى معاكى النهاردة
زى ما قولتيى اخر مرة شوفتك فيها
بس ياريت اقدر اعرفك
او تعرفينى
لانى نفسى اعرفك واشوفك واسمعك
بعد عن احلامى
ياترى حاقابلك النهاردة ؟؟

Monday, April 28, 2008


وحشتينى بجد
ملاقتيش ولا صورة انا وانتى مع بعض
قولت كفاية بس انك كنت فى يوم فى حياتى حضنتينى
ولسه حاسس بحضنك رغم فراقك
كان نفسى ابكى فى حضنك
وتضحكى معايا
ونخرج وتختارلى عروسة
وتشوفى ولادى حواليكى
وتبقى الحضن اللى بيحمينى من كل حاجة
سبع سنين وعشرة شهور وتلات ايام
وحشتينى بجد
الله يرحمك

Sunday, April 27, 2008

انا زهقت

والله زهقت من نفسى
مش عارف امتى حاكمل وامتى حابقى
وامتى حامشى وامتى حاجرى
وامتى حضحك وامتى اجرى
نفسى ابقى وادينى بحاول بس نفسى
ابعد عن نفسى

Wednesday, April 23, 2008

क ल ओ स ऐ डी





خلاص يابشر
افرح يا بلال يافضل
ارقص ياعلاء يااسوانى
دخن براحتك ياخيرى ياشلبى
انا حابطل كتابة
اكتبوا براحتكوا بقى
حاسيبلكم فرصة تكتبوا فيها
حابطل اكتب فى كل حاجة
واسيبكم تكتبوا
واشوف اخركم ايه
ولو فى يوم رجعت حتشوفوا ردى عليكم حيبقى ايه
*****
اصدقائى القلائل اوى اللى بيدخلوا مدونتى :डी
معلش حاضطر انقطع عن الكتابة خالص
لظروف قهرية اوى
بس ربنا يسهل وارجع تانى لانها فى دمى
بس لما اطلع من الظروف ديه
يالا حتاخدوا راحة منى فترة مش قصيرة
بس افتكرونى
سونة المرعب - حسين هاشم سابقا -







Tuesday, April 22, 2008

بكـــــــــــــــرة الشمـــــــس تطلع .. مصطفى فتحى

مرة اكون فرحان وسعيد كده من قلبى
حد يقولى ليه ما انت طول عمرك مكتئب
اقولكم انا كنت طول عمرى مكتئب
بس الايام ديه انا اتغيرت فيها
بقيت ايجابى وتخيلوا بقيت متفاءل كمان
ممكن عشان بدأ اعرف انا مين
بعد كام سنة من التوهان
انا لا عملت حجاب ولا عمل ولا نيلة
انا قابلت انسان جميل جدا
شوفته ايجابيته واحلامه وتفاؤله وطموحه
مش عارف لاقيت نفسى بعمل زيه
وابقى متفائل ومبتسم وعندى طموح
وبدأت افكر من تانى فى احلامى وافكارى اللى مخزنها
ولاقيت نفسى ماشى وبكتب كل حاجة بحلم بيها
الكتاب بتاعى والرواية اللى بقالى سنين بكتبها
وافكار مجنونة بتجيلى
وتخيلات
وخطط بمشى عليها
مصطفى فتحى انا مش بكتب كده على سبيل النفاق والريء والكلام ده
بس كلامى من قلبى وقولت لازم اعرف الناس من اللى خلانى متفاءل
واشكره واقوله انى انا بحبك ياصاحبى
بكرة الشمس تطلع يامصطفى ॥

Monday, April 21, 2008

انا عفنت

انا سطحى وافتخر
انا مش فاهم حاجة وبتكلم
انا مش بفهم وبفتى
انا ماليش فيه وبقول انا ليا فيه
انا بدعى ان انا مش انا
انا معفن ونتن وريحتى معبقة بس عامل نفسى نضيف وابن ناس كويسين
**********
طول عمرى بقول للناس اه انا عارف كل حاجة
وبفتى فى اللى ليا فيه واللى ملايش
وبتكلم بصوت عالى عشان موقفى ضعيف
وبمشى منفوخ عشان ماتبصش لجزمتى المقطوعة
وعامل نفسى عارفة وانى مبدع ومحصلتش ومش ححصل فى اى مكان
على نفسى بتننط وعامل فيها ابو العريف
وانا جاهل مابسوى بصلة
ياترى اعمل ايه عشان انضف من العفن ده

Sunday, April 20, 2008

هو أحنا ناقصين

حالنا كل يوم من اسوء الى اسوء حال
محدش عارف مين السبب ومين اللى ابتدىء السؤال
كل يوم واحد يتولد وواحد يموت ومنعرفش مين فيهم المسؤل
............
قمصان بدل على بلونات
ده بقى حالنا
احنا بقينا اللى برانا مش جوانا
بقينا عبارة عن اسامى بتتحرك
مش بنى ادم
نسينا احنا ايه
وبقينا بنجرى ورا سراب كل يوم
نسينا اننا بنى ادمين
عندنا احساس ومشاعر هى اللى بتميزنا
عندنا قلب وعقل وحب وحياة رقيقة
بقينا عبارة عن اجهزة كمبيوتر
الالات ماشية وخلاص
مش بتفكر ولا بتحس
ماشية فى روتين
ياترى حنفضل على طول فى روتين وحياة جامدة مفيهاش احساس
ولا حنتمرد على اللى جوانا ونعيشها بقلبنا وعقلنا بجد

Saturday, April 19, 2008

هو أنا مين ؟؟

هو أنا مين ؟؟


هو أنا صح ولا غلط ولا ايه الحدوتة ؟؟


هو أنا ناجح ولا فاشل ولا مجرد هوجة ؟؟


هو انا طيب ولا شرير ولا بين البينين ؟؟


هو انا صاحب ولا متصاحب او اللى اعرفهم بنى أدمين ؟؟


هو أنا حسين ولا ادهم و جام ولا مين ؟؟


هو أنا طالب ولا محامى ولا كاتب ولا نقيب الصحفيين ؟؟


هو أنا وسيم ولا جان ولا وحش ولا منفوخ زى البلالين ؟؟


هو أنا مين ؟؟؟

Friday, April 18, 2008

آل سياسة أل

سياسة ايه بس اللى عاوزانى اتكلم فيها
فيها ايه السياسة عشان اتكلم
فيها ايه السياسة اللى اتكلم فيها بعد فهمى هويدى وابراهيم عيسى والناس ديه
فيها ايه السياسة اللى بتخرب بيوت الناس من غير فايدة ولا نفع
فيها ايه السياسة اللى كل اللى اشتغل فيها لااما افاقين ومنافقين لا اما متعقلين او منفوخين
فيها ايه السياسة اللى تقعد تحت الغطا وماسك ورقة وقلم وترسم خريطة سياسة لعشرين سنة قدام
فيها ايه السياسة اللى مفيش حد فيها بيفهم فى السياسة
واخدة اكبر من حقها بمراحل
احنا اللى عملنا فيها كده

Friday, April 11, 2008

حبيتك أنا







اه بحبك انتى

معرفش امتى حبيتك ولا ليه حبيتك

بس اكتشفت انى فجأة حبيتك

بقيت اشوفك فى كل صورة وفى كل كلمة

بقت احلامى معاكى انتى

وبحلم اكمل مشوارى معاكى انتى

انا حبيتك .... افتحيلى قلبك

Thursday, April 10, 2008

راحل

أنا حر

مش حفضل محبوس تانى جوه المدينة

حنطلق حاطير واغوص فى الكون

مبقاش فى حاجة تقيدنى ومش حخاف

كفاية خوف

استنيت كتير مش عارف

طب لو استنيت كمان ايه ممكن يحصل

ولا حاجة ॥

اخدت قرارى وحارحل وحاغير كل حاجة

ومش حخاف تانى

ومش حافضل زى ما انا






وحشتينى


وحشتينى بجد
وحشنى صوتك
وحشنى وجودك فى حياتى
وحشنى رقتك وضحتك
وحشنى دموعك وفرحتك
وحشنى اسمى لما بتقوليه
وحشنى ملامحك وعيونك
وحشنى لمسة ايدى لايدكى
وحشنى سهرنا كل يوم
وحشنى كلامنا اللى مش بيخلص
وحشتنى سنين قضيها مع بعض
وحشتنى روحى ونفسى اللى مش بعرفها الا معاكى

Wednesday, April 9, 2008

الناحية التانية

اصبحت للاغانى للشباب كالدم فى الاوردة والهواء فى الرئة .. فاضحى من روتين الحياة الشخصية للشباب الاستماع الى الاغانى بكافة انواعها واشكالها احيانا.. ولكن مع هذه الظاهرة تعود ظاهرة كانت موجودة فى وقت قديم نسبيا وعادت بشدة هذه الايام وهى ظاهرة " تقديس المطرب " والتى نراها فى الفضايات وفى الشوارع احيانا .. فالامر الذى يستفز اى شخص هو ان المطرب هو عبارة عن شخص عادى جدا " زى زيك يعنى " مفيش اى حاجة مختلفة عن بقية البشر غير موهبة الصوت " اللى بقت عملة نادرة " فترى بعض الشباب وكثير من الفتيات كل همهم هو الاطمئنان على المطرب واخباره وكيف كان يومه .. وانتظار كلمات التى تخرج عن لسانه كانها حكم ومواعظ وحلول لااسرار الكون .. وكيف كان اخر " نيولوك " عمله .. ونوع الجل والكريم والملابس ومحلات بيعها الى اخره .. اخرها .. ظهرت موضه بيع " بوكسرات النجوم " التى انتشرت فى المحلات الى الارصفة .. فترى مطرب قد قدم تصريح لمجلة .. فيقول معجبيه ياله من فنان وعبقرى " ومفيش زيه اتنين " وفى مجلة اخرى يظهر ويكذب هذه الخبر .. فيقول معجبيه " ايوه كده مظبوط اصل استحاله يكون العبقرى ده قال الكلام الوحش " وهكذا ياشباب يكون المطرب مشهور بغيسل المخ الذى يظهر فى عقول مريديه يجعلهم يتبعونه الى المريخ اذا اراد .. فالمطرب او الفنان كعموم له عدة شخصيات كالتى يتقمصها .. فتوجد شخصية الورع التقى الذى يظهر على الملاء فى زى وهالة الايمان والتقوى .. ( وهى قليلة فى الوسط الفنى ) او يظهر فى شخصية ابن الناس الكويسين ( وهو تباع على ميكروباص مسطرد وربنا فتحها عليه ) او شخصية العالم بكل شىء والخبير والعبقرى ... الخ والعديد والعديد مش الشخصيات التى يظهرها على الناس وليست شخصيته الحقيقة .. فمنهم من كانت صحيفة سوابقه مليئة .. ومنهم من كان .. فهم مثلنا بشر عاديين طبعيين وليسوا الهة ولاانبياء – والعياذ بالله- وبالنسبة الى فنهم فهم ليسوا مبدعيه .. فمثلا المطرب فمن يكتب الكلمات ومن يلحنها ومن يوزعها ومن يسجلها ومن يختارها .. وما عليه الا ان يغنيها كما قالوا له .. فهذا السائد بين معظم المطربين اما بعض المطربين الذين شيب شعرهم فى الوسط الفنى فهم له حق الاختيار كما يريدون .. ولكن مافى ذلك ... اليس ما يهمنا ان نسمع او نرى فن جميل يروق لنا .. وليس لنا ان نتغزل فى طيبة وبشاشة المطرب او الممثل او ابداعه فالمبدعين للاسف ليس لهم وجود فالمبدع هو الله وحده وما نحن الا مقلدون...!

شىء اخير ... ليس كل من قال أنا يعرف نفسه فالنفس والانسان فى حرب ضارية من بدء الخليقة الى نهايتها .. فالتواضع صفة جميلة .. فلماذا نسينها .. اما تناسينا ماهيتنا واصلنا فالغرور صاحبنا فى رحلتنا فلنتركه ونرجع الى اصولنا ؟؟!

Tuesday, April 8, 2008

حاطبل السجاير وحاشيل حديد


بطلت التدخين اخيرا
بعد عناء عشر سنين شرب
بطلت التدخين
اخيرا حاسس ان الدنيا حلوة ونضيفة
والهوا حلو
رغم حتوحشنى كرشة النفس
وضيق التنفس
والنهجان وانا نايم
بس مش مشكلة
كل ايام والواحد يرجع رياضى من تانى
عبقالكم

Sunday, April 6, 2008

حتى الهتاف فى المسيرة برضه عيرة

كل حاجة بلدنا دلوقتى
بقت عيرة
مسخة
مالهاش لازمة
منظر منفوخ على الفاضى وبس
كل حاجة بقت مزيفة
الصحاب بقوا مزيفيين مجرد صحاب وفجأة بخ مفيش
والعيلة بقت مجرد تجمعات فى مناسبات رسمية وابتسامة عريضة زى اعلان سيجنال وبس
الناس فى الشغل بيقولوا صباح الخير وجواهم بيلعونك ويلعونوا ابوك
الناس فى الشارع ماشية خايفة من بعضها
الاكل بقى زبالة مترضاش بيها الحيوانات
الميه بقت ميه مجارى
الكلام بقى كله واحد ومفيش جديد
عقلك ياترى بيفكر فى ايه
انت مش عارف
حتى الهتاف جوه المسيرة برضه عيرة
كل واحد يعملك فرقعة عشان يتعرف
ومش مهم على حساب مين او ايه
بس يعمل عشان تشاور عليه وتقول مش هو ده
طعم الدنيا حتى بقى ماسخ
مفيش طعم
كل حاجة فى الدنيا ملهاش طعم دلوقتى
الاكل
والشرب
حتى الجواز بقى روتين
والناس بقت منفوخة على الفاضى
هدوم من فوق البنى ادمين
ومن جوه فراغ وفضى
حاجة قرف
يارب اصلح الحال

Wednesday, April 2, 2008

قالك ايه .. قالك اضراب يوم 6

والله انا احترت فى الشعب المصرى
بس بحبه يعنى عشان محدش يفهم حاجة
وبرضه الناس تفهم انى مصرى من زمان اوى
...
بس بيظهر فى المجتمع بتاعنا من حوالى عشر سنين
ظاهر موضة او هوجة بس مش بتاعه عرابى
بس كل شوية يطلع حاجة والناس تمشى وراه
ويوم ولا اتنين تنسى وكأن محصلش حاجة
...
سمعت ان فى اضراب يوم 6
عشان الظروف تبقى احسن
وكل واحد يتلقى معاملة احسن
..
والاضراب شامل كل طبقات الشعب
عمال وطلاب وموظفين وستات ورجالة
واطفال وبنات وشباب
كله على كله يعنى
...
الاضراب وسيلة حضارية للاعتراض
فى بلد الديموقراطية
والمساواة
والحريات
...
بس مااعتقدش اننا حنوصل بنتيجة زى ما الناس متوقعة
لان اللى بالى بالك عامل حسابه
ثانيا النقطة الهامة
انا مضرب عشان انا فاضى مش ورايا حاجة
فمش حتفرق معايا انى اقعد فى بيتنا من انى انزل
اما فى ناس عندهم شغلهم واكل عشهم
مش حيقدروا يضربوا عن حاجة
لانهم لو مروحش شغلهم
حيتخرب بيتهم
لاننا دلوقتى القطاع الخاص مش بيرحم حد
وممكن مع السلامة
...
وممكن فى اماكن خاصة محترمة
حتعمل كلها اضراب للمساندة
ناس احترمتهم اوى
...
الخلاصة ان الموضوع ده
خوف من ان لاتاتى الرياح بما تشتهى السفن
محدش يزعل ان محدش عمل اضراب يومها
لانك قدامك حل من اتنين
لااما خوفا على اكل عيشه
لااما يأس لدرجة انه مش مقتنع باى وسيلة لاصلاح الحال
....
وربنا يبعد عنا العصافير :>